Avokatja e Popullit, Znj. Erinda Ballanca dhe Komisionerja e Seksionit të Përgjithshëm, Znj. Vilma Shurdha ndoqën zhvillimet e Asamblesë së Përgjithshme dhe Konferencës së 13-të Botërore të Institutit Ndërkombëtar të ombudsmanëve (IOI), në Hagë.

Në panelin e diskutimit ku Avokatja e Popullit ka adresuar fjalën e saj, u theksua rëndësia që institucionet e Avokatit të Popullit të interpretojnë mandatin e tyre bazuar në parimet thelbësore si paanshmëria, pavarësia dhe llogaridhënia, duke synuar promovimin e drejtësisë dhe transparencës.

Znj. Ballanca evidentoi rëndësinë e Parimeve të Venecias në drejtimin e institucioneve të ombudsmanit, duke ofruar një kuadër gjithëpërfshirës për mbrojtjen e të drejtave të njeriut dhe llogaridhënien.

“Parimet e Venecias luajnë një rol të rëndësishëm në udhëzimin e institucioneve të ombudsmanit në interpretimin dhe zbatimin e ligjit. Këto principe gjithashtu caktojnë një standard të ri, më ambicioz, për mandatin e institucioneve të ombudsmanit në të gjithë Evropën”, u shpreh znj. Ballanca

Avokatja e Popullit vuri në dukje gjithashtu rëndësinë e besimit të publikut si një indikator që duhet të formësojë punën e institucioneve të mbrojtjes dhe promovimit të të drejtave të njeriut.