Strasburg, 12 Mars 2026 – Avokati i Popullit i Shqipërisë po merr pjesë në edicionin e dytë të Forumit të Nivelit të Lartë të Këshillit të Evropës me Ombudsman-ët dhe Institucionet Kombëtare të të Drejtave të Njeriut , i njohur si "CoE ON Forum".

Ky aktivitet dy-ditor, i cili zhvillohet në ambientet e Këshillit të Evropës në Strasburg, organizohet në bashkëpunim me Gjykatën Evropiane për të Drejtat e Njeriut.

Takimi i këtij viti është pjesë e "Paktit të ri demokratik për Evropën" dhe trajton rolin kritik që luajnë Ombudsman-ët në mbrojtjen e demokracisë.

Disa nga temat kryesore ku po kontribuon delegacioni shqiptar përfshijnë:

Mbrojtja e proceseve demokratike: Adresimi i ndërhyrjeve të huaja dhe ruajtja e balancës mes pushteteve.

Liritë themelore: Lidhja e pandashme mes të drejtave të njeriut dhe stabilitetit demokratik, me fokus te liria e shprehjes dhe e tubimit.

Forcimi i institucioneve: Shkëmbimi i praktikave më të mira për të garantuar që institucionet e pavarura të mbeten mburojë e shtetit të së drejtës.

Gjatë këtyre dy ditëve, Avokati i Popullit do të zhvillojë takime të nivelit të lartë në Këshillin e Evropës dhe në Gjykatën Evropiane për të Drejtat e Njeriut (GJEDNJ).

Pjesëmarrja e Avokatit të Popullit në këtë Forum rikonfirmon angazhimin e Shqipërisë për të përafruar standardet kombëtare të mbrojtjes së të drejtave të njeriut me ato evropiane, veçanërisht në një kohë sfidash globale për demokracinë.