Sekretari i Përgjithshëm i Avokatit të Popullit, Z. Fatbardh Zenelaj, mori pjesë në Konferencën Ndërkombëtare të Ombudsmanëve dhe Institucioneve Kombëtare për të Drejtat e Njeriut mbi Mjedisin, që u zhvillua në Shkup, Maqedonia e Veriut.

Gjatë prezantimit të tij, z. Zenelaj theksoi rëndësinë e trajtimit të çështjeve mjedisore në kontekstin e të drejtave të njeriut.

“Dëmi mjedisor nuk është më një koncept abstrakt, ndikimet e tij janë gjithnjë e më të dukshme dhe prekin të drejtat themelore të njerëzve; të drejtën për jetën, shëndetin dhe një mjedis të sigurt dhe të qëndrueshëm”, u shpreh z. Zenelaj

Më tej, Z. Zenelaj nënvizoi rolin e Institucioneve Kombëtare për të Drejtat e Njeriut (IKDNJ) në sigurimin e mbrojtjes së të drejtave mjedisore për qytetarët.

"IKDNJ-të luajnë një rol thelbësor në lidhjen e çështjeve mjedisore me mbrojtjen e të drejtave të njeriut përmes sigurimit të përgjegjësisë dhe mbrojtjes së të drejtave mjedisore të qytetarëve, duke hetuar ankesa nga publiku për dëm mjedisor ose shkelje të politikave. Këto institucione janë në gjendje të ofrojnë një lidhje të rëndësishme midis individëve dhe autoriteteve shtetërore, duke u siguruar që zëri i qytetarëve të dëgjohet dhe të merret në konsideratë në proceset vendimmarrëse që ndiejnë ndikimin e politikave mjedisore."

Ai gjithashtu theksoi angazhimin e Institucionit të Avokatit të Popullit në trajtimin e çështjeve mjedisore, ndërsa bëri me dije se në vitin 2023, janë adresuar 8 rekomandime për autoritetet mjedisore shqiptare, ndërsa për vitin 2024 janë përgatitur 6 rekomandime të reja që përfshijnë, forcimin e zbatimit të Konventës së Bernës, pezullimin e projekteve ndërtimore deri në përfundimin e vlerësimeve të plota të ndikimit mjedisor, si dhe reduktimin e ndotjes nga akumulimi i mbetjeve dhe ndalimin e djegies së tyre në zonat e prekura.

Pjesëmarrja e z. Zenelaj në këtë konferencë nënvizon përkushtimin e Institucionit të Avokatit të Popullit për të avancuar drejtësinë mjedisore dhe për të ndërtuar një kulturë transparence, përgjegjësie dhe përfshirjeje qytetare në mbrojtjen e mjedisit si një pjesë integrale e të drejtave të njeriut. ‎