Në Ditën Botërore të Rinisë, kemi një mundësi të veçantë për të reflektuar mbi vendin kyç që rinia zë në shoqërinë tonë. Kjo ditë na kujton rëndësinë e investimit tek të rinjtë tanë, duke u siguruar atyre mjetet dhe mundësitë për të qenë pjesëmarrës aktiv në proceset shoqërore.

Rinia përbën një burim të pashtershëm energjie dhe inovacioni! Të rinjtë janë shtylla e përparimit dhe zhvillimit, dhe mbështetja ndaj tyre nuk është vetëm një detyrë morale, por edhe një investim strategjik për të ardhmen e vendit tonë. Prandaj, është thelbësore që çdo vendim dhe politikë që miratohet të ketë në qendër të saj mirëqenien, zhvillimin dhe fuqizimin e rinisë.

Avokati i Popullit mbetet i përkushtuar në mbrojtjen dhe promovimin e të drejtave të të rinjve. Ne do të vazhdojmë të monitorojmë zbatimin e të drejtave të tyre, duke garantuar që të rinjtë të kenë qasje të barabartë në arsim, punësim dhe pjesëmarrje në jetën publike.

Në këtë ditë, Avokati i Popullit i bëj thirrje të gjitha institucioneve publike dhe private, si dhe shoqërisë civile, të punojnë së bashku për të mbështetur dhe fuqizuar të rinjtë tanë, duke i njohur ata si partnerë të barabartë në zhvillimin e shoqërisë.

Rinia është forca e së nesërmes!